Mon papa té ankor la, pars li l’avé pankor pass l’ote koté d’la vi é li téi konpran pa in kozman konmsa. Pou koué ? Pars danntan delo téi ariv pa dann shak mézon, téi falé alé rode delo, kissoi dann in sourss, kissoi dann la fontène piblik é zistoman kan la plui téi tonm sa téi évite in bonpé d’moune pou fé in korvé d’lo.

Mé lo tan la shanjé é kan delo i koule pa, mèm si la plui i dévèrss vèye pa koman, lo moune i panss sèryèzman i manke azot kékshoz, kaziman ké zot lé paralitik… Lé vré koméla toute rézon lé bon pou dir d’moune ramass pa delo la plui pars sa lé pa bon pou la santé si zot i vé, koméla i di demoune ramass pa lo d’plui pou kui manzé, pou bégné, an fète lo-la lé bon arienk pou la shass d’eau.

Par konte i koné dir l’monde si lo lé brouyé dann robiné, i fo fé bouye ali troi minite aprésa i pé boir. Mé si i koul pa dann robiné, si la plui i tonb é ké wi gingn ramass delo, bin so foi issi, lé pa késtyonn fé bouyir delo ni pou bégné, ni pou boir… Néna in pé, mi jur azot, la tyé kouyon pou pran son plass.

A bon antandèr, salu !

Justin