Oté

« Mi vann konm moin l’ashté. »

In kozman pou la rout

Justin / 26 févrié 2020

JPEG - 43.6 ko

Mésyé, Médam, La sosyété koz èk moin sé koz èk in kouyon mé sé o pyé d’lo mir k’i oi lo mason. Kozman moin la mark an-o la zordi dizon sé inn manyèr ankouraz bann ladi-lafé. Pou kosa ? Pars an vérité dir in n’afèr konm lé marké an-o la sé pou di sinploman : demoun la di amoin tèl shoz é mi répète, bien antandi san prann la résponsabilité. Kosa i répète san prann la résponsabilité ? La plipar d’tan sé bann la di-la fé, kékshoz fasil mé konm zot i konpran na poin la garanti la vérité. Néna plizyèr manyèr fé ladi-la fé : dabor ou i pé karéman invanté, épi ou i pé galman donn in fo sans in kékshoz i pé z’ète vré kan la shène lnformasyon la komansé mé apré afors pass boush an zorèye, boush an zorèye, i fé ké ou i rakont la kouyonad. I pé osi di in n’afèr li rosanm la vérité mé o fon la pa la vérité ditou. Alor mé zami, mi souèt in n’afèr : biensir mi vé pa shakinn i fé in démonstarsyon syantifik sak li rakont mé konm i di, « tourn sète foi la lang dan la boush avann kozé »-mi pans sa sé in bon prékosyon. Alé ! Mi kite azot rofléshi la dsi é ni rotrouv pli d’van. Sipétadyé !