Bann gro kador lo ministèr, la pa arienk zordi, la touzour pans bann ti-kolon lé in pé initil akoz zot na poin in list diplome i sort an-o, i fini an-ba. Koméla, i apèl sa bann prékèr. In tan in pé téi di zot i travay shomèr, éstèr zot i pé di zot i travay prékèr. Dizon, topète pou morette.

Na in gouvèrnman, in zour, la di bann prékèr i travay lékol i fé parti la kominoté édikativ. Mi pans bann gran shèf la dï pète a rir : zot la poin in bon lopinion bann ti-kolon. In pé d’tan apré, dann tan Raffarin, la di alé oir konsèy zénéral sansa konsèy rézional si z’i sui. Soman, bann i diriz lo dé konsèy la di la poin assé dmoun i travay la-dan, avan “externaliser” i fo k’i anbosh an sifizans épi k’i konpans lo bann dépans.

La paf é tout sak i fo, épi pli pir ankor, la pa ronouvèl kontra bann prékèr, alor in pé partou i mank demoun, épi lo bann lékol i marsh pa konm k’i fo. Zédi, dann in kolèz lavé poin d’moun pou rouv konm pou fèrm la port. Sa la pa la grèl in n’afèr konmsa. Sak i vé rantré i gingn pa, sak i vé sorti i gingn pa. Konm di séga lontan : mi vé rantré, moin la pi kapab, mi vé sorti, moin la pi kapab, épi kabri i manz salad !

Justin