L’èr-la mwin la réfléshi in pé par mwin-mèm épi mwin la di : pli instrui i vé pa dir pli éfikass ? Pli instrui i vé pa dir pli motivé, pli instrui i vé pa dir pli répéktyé lintéré zénéral. Kan lo madam i parl demoune i ékri papa avèk troi p pars i koné pa oussa i mète lo katriyèm, èl i vante lo dégré d’linstrukssion, el i vante lo diplôme, èl i fé léloj lo pli instrui, san bien rogardé kissa i lé lo pli fidèl bann prinssip la démokrassi épi lé fifélité pr rapor bann valèr...

Astèr lé bien sir in moune instrui i doi pa zète dépréssyé pars li néna linstrikssion pars mi koné demoune i panss si inn pèrsone lé instrui sé pars èl lété dann méyèr kondission d’famiye épi d’bien-ète pou bien étidyé. Mé mi panss sé pars bonpé i néglij lo bann zéfor fé par in moune rodinèr pou gingn son bann dilome. Mi di ossi si in moune lé kiltivé i vé pa dir ké li néna moinss kapassité ké lé zote.. ; Astèr mi néglij pa non pli la volonté in moune néna pou progréssé avèk toute bann rossours la sossyété i mète a son dispozission..

Alor kan i ariv lèr pou voté si lo diplôme lé pa lo méyèr kritèr d’shoi, la kapassité épi léfikassité i doi pa z’ète néglijé, mé néna in kékshoz inportan sé lidéoloji. Pèrsonèlman, mi roshèrch toujour in kandida kominiss é rényoné parss la késtyon d’idéoloji sé in késtyon inportan. La plipar d’tan in kandida la droite la pa kékshoz k’i bote amwin - in kandida RN mi anparl mèm pa pars mi koné lisytoir lo mouvman lékstrème droite.

Lo shoi d’in kandida sa lé plisk’inportan é néna an zé in bonpé faktèr é sa sé in afèr i fo pa négliozé. A bon antandèr salu !

Justin