Kan mi antan dmoune apré lir in tèks an piblik sansa si l’moune l’apré kozé, shanté, rakont zistoir si kékshoz konmsa lété possib fitintan kan mwin lété jenn marmaye é mi panss dann tan kékshoz konmsa noré té difissil a fèr.

Biensir pou rakont zistoir l’avé bann rakontèr d’zistoir é dizon sa téi mank pa : zistoir Pti Zan langouti rouz, zistoir lyèv avèk torti épi d’ot ankor. Biensir demoune téi fé diskour dan la politik si l’avé inn k’i koz lé zot téi koz pa tro… Pou mwin l’avé bonpé d’moune té kantoné dann silanss.

Mwin la fine rakont azot listoir in madam apré ékout in diskour Gasparin é téi di : « Sof koué k’ti di mé k’ti koz bien ». Sa téi vé dir èl téi konpran pa granshoz, konm sirman bonpé d’moune.

Donk d’apré sak mi romark demoune la shanjé issi La Rényon é zot lé kapab manyé bann zidé, téléfone radio, koz a l’antène, krétiké si néna pou krétiké, apréssyé in n’afèr si néna pou apréssyé, dir lé bon, dir lé pa bon é sa sékékshoz mi apréssyé.

Lo pèp la shanjé é sirtou li lé kapab égzisté mèm si li lé pa dann son mond alié mi oi sa konm in bon n’afèr pou nou La Rényon é mi panss zébnérassion apré zénérasion lo Pèp va progréssé, va avanssé, li sar pli kiltivé an zénéral é sa sé in bon pwin pou li é sa sé in bonpwin pou nou.

A bon antandèr salu !

Justin