Kan la dézyèm guèr l’Irak té fini, dann l’Amérik, lo prézidan té i apèl George W. Bush, é lo vis-prézidan té i apèl Dick Cheney. Boug-la té i fé pa lanbara pou amène la politik épi lo biznèss an mèm tan. Pou li, té i falé mète la min dési bann rézèrv pétrol dann désèrtin péi. Son poinn vizé lété l’Irak pars li té i oz pa atak l’Iran... lété tro riské. Alor, la trouv in rézon pou atak lo péi, pars solon la propagann l’Amérik, l’avé la-ba bann zarm déstriksyon masiv. Lété inn krak, mé l’Amérik i kass pa la tète èk sa. Kan la guèr té fini, bann z’antropriz Dick Cheney la aranz azot pou an avoir bann gro kontra, kisoi dann batiman, kisoi dann soi-dizan la sékirité, kisoi ankor dann pétrol ou sinonsa pou aport toute sak l’armé l’Amérik l’avé bézoin. Sa lété dann l’Irak !
Akoz mi anparl sa zordi ankor ? Pars la guèr l’apré fini dann péi Libye. Sa in péi rish osi sa, késtyonn pétrol. Epi bann l’aviyon l’OTAN la fine si tèlman kraz lo péi ké, konm zot i di, i fo rokonstruir. Moin lé sir, nora ankor la sékirité pou asiré. Donkalor, biznèss i mank ar pa, é moin lé sir bann péi l’OTAN i mank ar pa lokazyon pou partaz la dépouye... I prétan dir, dann péi Libye, kan i vann pétrol, in takon larzan i partaz rant lo moun i abite la-ba, rant bann tribi, épi lo gouvèrnman. Sa i apèl la rant pétrol. Sa sé in n’afèr, moin lé a dmandé si bann péi l’OTAN va aksèpté. Sa i kol pa ditou avèk zot manyèr fé lo biznèss.
Arzout èk sa, sé Kadhafi, kan li la pran pouvoir, la déside mète anlèr in sistèm konmsa. Moin lé sir, dépi sis moi la guèr la komansé, bann konpagni pétrol la pa mank fé zot plan pou oir koman i sava fé bann bon z’afèr. Pa arienk zot, mi sipoz... In bann kaparèr sirman, la vèy sa konm lé dsi l’fé. Zordi, moin lé sir, in bonpé i lèsh zot doi : "Miam ! miam ! Ya bon, ya bon pétrol libyin !".

NB : Avan, Khadafi l’avé in bann profitèr dann la Libye. I paré k’in zour, bann jènn z’ofisyé libyin lété an voiyaz dan Londres, é dépi shomin dan la vil zot té apré louk bann profitèr apré fé la bring é zot té i di : « Ala koman i dépans larzan nout pétrol ! ». In pé d’tan apré, bann z’ofisyé la fé in kou d’Etat pou fé arète sa... Zordi, pétète, i arbate aryèr ? Ki vivra véra !

Justin