Lindi gran matin, mi ékout RFO in pé konm si konm sa, lo tan mon kanète dé zié i rouvèr gran, épi mon vié doulèr shikungunia i pass-pass in pé. Gran matin-la, banna i fé in pé lo zé, épi i koz-koz èk demoun... Mi antann lo lanimatèr i poz késtion bann zoditèr déssi la manièr ékri an kréol.

Li domann in moun si li lé pour, sansa si li lé kont lékritir KWZ. Biensir, moin nora préfèr lo lanimatèr i koné bien son n’afèr, akoz kan wi di KWZ, wi tonm in pé dakor avèk sak déssèrtin moun i di san alé rod pli loin : zot i déform la vérité pou roul demoun kari sou d’ri... Alon pa kass la tète pou sa, mé moin la antann inn-dé répons pou moin lé valab : inn la di, li kas pa la tète pou sa, provik li gingn ékri son téksto. In n’ot la di, li koné lékritir tangol, mé li pans i fo pa ni diviz anou déssi so késtion lékritir la lang kréol.

Pou moin, sa in kozman mi èm bien, akoz pou moin, sa in bon manièr fé ; pa solman pou la lang, mé pou l’énèrzi galman, pou lo dévlopman dirab, épi la démokrasi. Fransh vérité, dan la lang konm dann tout z’afèr, mié vo nou lé ini plito k’divizé.

Justin