Yèr matin, kan moin la rouv mon radyo dsi Rényon Promyèr, moin la antann demoun apré donn zot poinn vizé dsi l’idé nout kamarad Élie Hoareau pou in rofondasyon PCR. Bien antandi nana in bonpé poinn vizé. Ou i pé ète dakor èk sak demoun i di, sansa ou i pé ète pa dakor. Na défoi mèm, in pé i fé sote aou anlèr, pars ou i oi pa out parti konmsa.
An parmi bann kozman-la, moin la antann in tantine apré di lo Parti kominis lé mizozine. Si mi konpran bien, sa i vé dir li détèst bann fanm, li lé ostil par raport bann madam, mèm li mépriz azot. Pou kosa sa la fé sote amoin dann mon vyé karkas loto, ziska pèrd lézèrman lo kontrol ? Pars, an parmi bann madam moin la konète in bonpé militante Parti kominis. Kisa, parmi bann z’ansien, i rapèl pa Isnelle Amelin, madam Lamarque, Aliette Gauvin, madam Gamelle, madam Marat épi d’ot ankor. Kisa i koné pa madam Vergès Laurence épi d’ot ankor. Nana si tan tèlman mi gingn ar pa di lo nom dann mon pti modékri.
Zordi nana in bonpé militante dann nout parti é mi pans zot lé zot plas é bann bononm i pans sa galman…
Kisa la anparl Heva, la famm lo zésklav Anchaing, an promyé si la pa Parti kominis. Kèl parti la fé la fète an promyé pou la Zourné mondyal bann fanm i tonm lo uit mars si la pa Parti kominis. Bann dirizante l’UFR lété pa bann militante kominis an promyé ? Mamzèl, mi koné pa ou, é konm Jean-Yves, in gran kamarad Le Port, la bien di, li réspèk out poinn vizé, moin pèrsonèl m’a suiv ali, mé dizon, kan ou i koné pa in n’afèr ou i pran ransègnman, ou i lir zournal, ou i répète pa konm in vérité in déformasyon la réalité.
Pétète domin in pé va dir lo parti lé kont lo séga, lo maloya, i kass pa la tète pou lésklavaz konm krime kont l’imanité, i kass pa la tète non pli dsi l’angazism, la pa défann bann plantèr, lé kont bann z’ouvriyé ; pétète i pé di d’ot z’afèr ankor, mé pardon éskiz, in mansonz répété mil foi la pa in vérité. Mil mansonz répété mil foi, la pa non pli mil vérité.

 Justin