Mé pou nou, Parti kominiss dann Sin-Dni, nou k’na pou prozé konbate la mizèr épi gonf in pé lo pla demoune pov, ébin sa lé valab pou nou : ni vann pa bann plante, nou la pa bézoin i di anou mèrssi ; noute rékonpanss sé kan noute bann konpatriyote va fé zot zardin tizane épi va amélyore zot manzé an kantité épi an kalité. Wala noute rékonpanss.

Samdi nou l’amenn dann noute konféranss, dsi in tab in trantène pti po la tizane : an gro l’avé pyé soriz kotlé, l’avé lo tin brézilien, l’avé ankor tizane marjolaine, épi d’ote ankor. Té pou sa ? Té pou done sak téi vé pran épi bien sir néna noute prozé : distribyé dann in délé rézonab mil pyé la tizane..

Pou kossa nou va fé sa ? In marmaye lé énèrvé, ékssité, son famiye i done ali la tizane konmsa li dor myé, son famiye galman, é wala in kou d’min la pa négijab. Marmaye néna in kor d’fyèv, in tizane sriz kotlé normalman sa i sifi. In pyé lo tin brézilien ? Sa lé bon pou lakomodman épi ossi konm tizane san pass forsséman par la kaz farmassi.

In kontribission, mèm in pti kontribission, pou évite vide porte-moné d’moune… Mé sa lé valab solman si néna in bon distribission bien roganizé mil pyé tizane pétète mèm pliss si toute i done la min. Noute sékssion, alyanssé avèk d’ote si i fo, wala sak i pé fé konm Léon Lépervanche téi di : ala in bon travaye kominiss.

A bon antandèr salu !

NB la suite sak nou la ékrir pou lindi.

Justin