Sé konmsa ké dann tan Michel Debré in pé la désside fé la fète lo bann promyé zabitan La Rényon é in pé la shoizi konm date l’ané 1665 pars l’ané-la in sèrtin Étienne Regnault la pran la tète in lékspédission pou komanss lo pèpléman noute péi — atanssion dann tan téi falé pa di péi pars sa lété i fé parti lo vokabilèr bann séparatist. L’ile la Rényon sa lété bien mèm tré bien… san z’ète tro bien.

Akoz la pa pran l’ané 1663 ? Sète ané-la dë franssé avèk dis malgash la débark dan la bé Sin-Pol… albo santrism kan wi kol èk nou. Promyé franssé alé oir l’avé dis malgash épi in franssé ziska zordi la pèrde lo nom lo dézyèm.

An o-lyé mi panss sirman la diskite avèk sa épi la désside pran l’ané 1965. Toute fasson zoinalis Témoignaz téi assist pa bann konféranss de préss é la vérité — la sèl vérité-téi lir dann la press bien penssante, épi téi antann dann la voi lo prézantatèr ofissyèl dann la télé an noir épi blan…

Pou mète in poin final avèk mon souvnir an parmi bann malgash l’avé sète bonome épi troi fam é banna la sové dé k’la kosté é lo dé éropéist la rèss toussèl an atandan Étienne Regnault i ariv. Apré sa bann malgash la rokol avèk la bann é l’avé mèm in zanfan éné dann lo dékalaz dë z’an. Souvénir ! sounénir !

A bon antandèr salu.

Justin

NB o fète pou kossa mi di azot sa mwin ? Pars dann dë troi zour i sava fète la prézanss bann malgash shé nou lo 360 eme z’ané. In bon lokazyon pou fété zot i panss pa ?