Mi sipoz zot i koné lo provèrb bann fransé i di « Donan, donan ! » é ni konpran bien kosa sa i é dir. Sa i vé dir, mi donn aou in n’afèr é ou i rodone amoin in n’ot afèr. Sinonsa mi donn aou in marshandiz, ou i donn amoin l’arzan k’i koréspon san atann domin, tout-suit pou tout-suit. Bin figir azot kan ni di « min gosh, min droit » sé lo mèm z’afèr. Lo kontrèr d’sa i pé z’ète : « Mi poz zéro, mi artien tout ! ». Sa i vé dir mi pran mé mi pèy pa é sa la pa in bon manyèr pou agir pars si ou la trap in moun in foi, ou i trap-ar pa li dé. Pars proshènn foi kan li oi ou i ariv, li ramas son kékshoz. Bon kont i fé bon z’ami, mé mové kont i fé solman mové z’ènmi. Alé ! Ni rotrouv pli d’van !