Sof in n’afèr, mi romark shak foi é opliss banna i vien issi opliss zot i fé konmsa é mi poz amwin la késtyon : kossa zot i diré si zot i sava médssin é si médssin i done azot médikaman san fé sak i apèl in diagnostik, san rode la maladi zot néna… mi panss zot i trouvré sa in pé bizar mé shakinn son fasson d’oir lé shoz.

Mwin pèrsonèlman mwin néna konm l’inpréssion so bann moune i pass i ropass zot lé bien antréné pou réponn dsi lo konzonktirèl — konm in pé i di — é zamé dsi lo striktirèl, dsi la sirfass dé shoz, é pa dsi lo fon dé shoz é sé pars i réponde pa dsi lo fon dé shoz ké nou lé touzour apré tourn an ron san ansorte anou par anlèr.

Biensir konm la voi d’son mètre li la anparl bann monopol é zot résponssabilité dann la shèrté d’la vi mé la shèrté d’la vi sa ni koné é la pa zordi sa la komanssé. Astèr bann kozman konte bann monopol la pa promyèr foi ni antann sa é bann grann sirfass i pran sa pou la valèr donk pou d’lo dsi la plime kanar — dsi fèye sonz si zot i profèr.

Astèr ni koné ossi issi la rényon néna in gro problème lojman a avèk san karante mil pèrsone mal lojé, épi vin mil pèrsone dann bann lozman indign — é kan i di indign ébin sa i mérite lo détour… Dizon lé konm bidonvil nou téi koné lontan, nou la vnyabou sorte ladan pou artonbé final de konte é si i kontinyé nou va pass dopi vin mil, talèr nou va trape trante mil, inssi d’suite ziska ké La Rényon sar kouvèr avèk bann lojman insalub.

Mi arète tèr-la pou l’instan é pou dir azot miniss i pass i ropass mé opliss zot i pass opliss i ariv pa ansorte anou — sirman pars la pan ou k’i gouvèrn anou. Néna in mo lé bien adapté noute sityassion, sé lo néo-kolonyalism.

A bon antandèr, salu !

Justin