Tout mor té d’bon moun. Touléka, ou na so l’inprésion kan ou i antann demoun an parlé. Lo pli pir moun kan li lété vivan i gingn konpliman kan li la fine pas koté d’tanto. Toulmoun, gro vaza konm ti-kolon, dèrnié an parmi lé dèrnié, konm bann gran pèrsonaz. Ziska Maggie Thatcher la gingn son konpliman.

Maggie Thatcher ? Zot i koné madam-la ; amoins ké zot i pans èl lé mor dopi bèl az é bo tan. Non va, li la fèrm son zié na dé zour, lo uit avril sèt ané. Madam-la lété pandan diz-an Promié minis l’Anglétèr. La « Dame de fèr », konm té i apèl aèl, mé dame de fèr avèk bann zouvriyé, bann sindika, bann révolisionèr irlandé, bann pov, pa avèk lo mond la finans, pa avèk bann réaksionèr non pli.

M’a done azot an vrak désèrtin parmi son bann forfé. Miss Maggie la lès bann minèr sharbon fé in grèv pandan in an, arienk pou fini avèk zot sindika. La fini galman avèk bann mine sharbon, pars dopi tan-la, l’Anglétèr i inport son sharbon. Pou èl, si l’individi i égzis, la sosiété i égzis pa. Pou èl ankor, bann préstasion sosial, sé in gaspiman l’arzan. Lo diktatèr Pinochet té son ami. El la lès dis révolisionèr irlandé — an parmi Bobby Sands — mor d’fin, l’èr banna té apré fé in grèv la fin pou k’i rokoné zot kalité d’prizonié politik ; El la fé travèrs son l’armé l’oséan Atlantik pou alé arpran bann z’il Malouines é an pasan kraz l’armé l’Arzantine.

Mésié Hollande la pa mank anvoy son mésaz kondoléans gouvèrnman l’Anglétèr... In moun pli avizé ké li, in sosIalis, François Mitterrand, té i di, an parlann madam Thatcher : « El na la lèv Marilyne Monroe, mé son rogar, sé sèt l’anprèr Caligula ». In tiran parmi bann tiran.

Justin