Pou sak l’avé z’ot konésans dann lé z’ané 60 épi té i suiv in pé l’aktyalité, mi dout pa ké lo nom Modibo Keita i di azot kékshoz. Avèk Sékou Touré, Léopold Sédar Senghor, Kwane N’krumah zot la mark z’ot épok pars tout bann moun-la lété papa l’indépandans z’ot péi : Sékou touré té promyé prézidan La Guinée, Senghor promyé prézidan lo Sénégal, N’Krumah promyé prézidan lo Ghana é Modibo Keita promyé prézidan lo Mali.

Modibo Keita té i déklar ali sosyalis é li la sign bann z’akor avèk l’URSS é d’ot péi L’érop de l’est. Li té i rovandik ali konm panafrikin é dann so panafrikanis li té asosyé avèk Sékou Touré, N’krumah épi d’ot ankor. Li té osi in dirizan tyèr-mondis é lété L’egypt, l’Ind, l’Indonésie ké li té i frékant dann tan-la. Li té i kritik lo pakt néo-kolonyal signé avèk lo gouvèrnman De Gaulle. Li téi vé in moné afrikène é mèm in l’armé afrikène pou l’afrik fé réspèkt aèl.

L’èr-la lé shoz té klèr, soi i pass soi i kass é malorèzman pou so gran dirizan afrikin lé shoz va kasé dann in kou d’éta améné par l’armé. Lo diznèf novanm 1968, lo pouvoir Modibo Keita i tonm avèk lo kou bann z’ofisyé malien komandé par in lézyonèr l’armé fransèz, Moussa Traoré. Modibo Keita lé fé prizonyé épi déporté dann nor lo péi, dann la vil Kidal. La-ba, li mor dann in kasho pars lo jolyé la fé manz ali manzé anpoizoné.

Astèr i rès arienk pou abandone lo prozé d’in moné afrikène é rotourn dann kan lo fran CFA. Lo nouvo pouvoir i abandone lo panafrikanism, é firamézir sorolasyon ékonomik avèk bann péi sosyalis… I kout shèr pou défyé Lo Frans - Afrik !