Zot la pankor fine romarké pou désèrtin moun la vi d’avan lété méyèr ké la vi d’zordi ! Mèm bann diplom lontan lété, d’apré désèrtin, pli valab ké diplome koméla. Ziska pou in pé l’oto lontan lé pli vanté ké l’oto zordi.

Pou mon par, moin la touzour pansé ké lo moun i mazine lé shoz konmsa, dann fon zot i rogrète z’ot vintan. La vi lé pli bèl kan ou lé jenn é kan ou i pans so tan-la, in kou d’nostalji, in kou d’blouz i pèz aou atèr… Poitan, a bien kalkilé, si nou lé onète avèk nou mèm, ni oi bien la vi koméla lé pli bèl ké la vi d’lontan : késtyonn loizir, késtyonn la mod, késtyonn nouritir, késtyonn téknik.
Spandan, in pé i kontinyé dir zot i préfèr la vi d’avan.

Mi lès azot kass z’ot tèt dosi so mistèr-la. Alé ! Ni rotrouv pli d’van.