Oté

Moin la fayi fèr in modékri dsi la koup kann dann tan lontan

Justin / 8 juillet 2020

JPEG - 43.6 ko

Médam zé Mésyé La sosyété, moin la fayi fé in modékri dsi la koup kann dann tan lontan pou zoinal lindi. Modékri la téi di : La koup lontan lété pa konm la koup koméla. Lontan la koup té konm in fète pou tout landroi téi plant kann épi téi baz la dsi pou bonpé d’moun gingn zot soso :

Bann plantèr an promyé vu k’zot l’avé ral gongon d’mizèr plis sis moi é lo tan lété fine arivé pou gingn in moné pou délash in pé sintir. La famiy téi réspir késtyonn mète in pé do bèr dsi lo zépinar.
Bann koupèr kann pars zot téi sort pass in vi dir é zot téi prépar azot pou alé dsi in gran bitasyon pou gingn in moné épi ramas lo kayas k’i fo pou sèye ranpli zot boujaron épi sète zot famiy pou plizyèr moi.
Bann komèrsan, pars zot la fé krédi in bonpé moi bann plantèr é lo tan téi vien pou fé ranbours azot lo krédi marké dsi karné : karné téi sèrtifyé la pèrsone l’avé pran a krédi dann zot boutik épi è i ranbours astèr ké la komans liv kann la balans.
Bann shartyé osi lé kontan, pars zot i liv zot kann, épi kann sak la poin sharète an péyan siouplé, donk lokazyon ranpli zot boite larzan.
Marmaye té kontan, pars avèk tousa sharète i pass néna moiyin ral in kann pou alé siss sa kékpar asiz dsi in rosh piké, sansa in rosh blé.
Bèf osi lé kontan, pars pou donn azot la fors lo propriétèr téi donn azot in bon rasyon avèk maskade, tourto, patat kui é d’ot bone shoz i trouv dann gran marmite apré kui dsi lo fé d’boi… Marmaye osi i yèm sa, pars sé lokazyon pou alé rode in patat bouyi dann marmite é pou kontant zot l’apéti. Si la pa patat, sé konflor é inn konm l’ot lé bon a manjé.

Mé zami, komansman la koup sé lo tan pou béni kouto, béni sharète, béni osi lo bèf pou tout lo travaye li sava fé. Défoi mèm i béni lo bèf avèk in bouyon lo safran, in bouké flèr rant lé korn. Ala sak moin la ékri azot pou lindi matin. Ala sak moin téi savr domann pou mète dann zoinal mé oilakou d’manké : la koup la pa komansé sansa la fé in fo komansman.

Mi pans mardi matin li va komansé, sansa mèrkrodi, an touléka somenn isii fo li komans : promi, ziré, krashé.