Sa in vyé provèrb mé tazantan na dmoun i di kozman-la. Pa bann jenn biensir, mé demoun déza rézonab. Dann l’idé kréol, lo dèrnyé zanfan in bononm, sé in vyé zanfan li la fé avèk in vyé rès sak zot i koné é li lé moins intélizan, moins kapab ké lo bann promyé. Konm zot i konpran in kozman konmsa na poin in baz syantifik ! Son sèl baz lé d’dan la kroiyans demoun é in kroiyans bazé dsi arien. Kansa in moun i pé lans in kozman konm sak lé marké an-o la ? Kan li na l’inprésyon son kapasié lé pa rokoni, kan sanm pou li demoun i pran ali pou in inbésil. Mé pou arvnir dsi la késtyonn lo dèrnyé zanfan, ni pé romark in n’afèr : par ébzanp ké li sé in zanfan gaté é in zanfan gaté la pa bézoin forsé pou son famiy done ali in kékshoz. Li lé pa abityé forsé é si i fo li fors ni pé dir li lé pa paré pou sa épa pou in rézon zénétik, fizik, fizyolozik. Alé ! Mi lèss azot réfléshi la dsi é ni artrouv pli d’van sipétadyé.