La pa pars zot i di ké ni pé pa ké nou lé pa kapab ! Ala in késtyon i tourn dann mon tète san arété. Kosa mi anparl ozis zordi, dann l’anplasman lé reserve dann zournal pou moin fé mon bann modékri... é mi pans dsi in késtyon moin la pankor shanj kanstréti in pti bout, kansréti d’in « iota » - dèrnyé lète é pli pti lète nana dann l’alfabé grèk, in l’éksprésyon pou dir in moun la pa shanj ditou.

Donkalor, dsi kèl késtyon moin la pa shanj ditou ? Sé la késtyonn la konfyans dann mon péi é mon bann konpatriyot dsi nout kapasité dévlop nout péi pou in bon l’avnir. Myé k’sa, afors lo tan i pass, afors mon konfyans i ranfors. Pou kosa, pars lo tan i shanj é tout lo bann lanspèk banna la mète pou anpèsh anou avansé, sanm pou moin, i tonm inn apré l’ot.

In tan téi di i pé pa viv san pétrol, zordi i oi sa la pa vré. In tan téi di i gingn pa plant la tèr san l’angré, san poizon shimik é san l’ézèrban, zordi i oi sa lé mantèr. In tan téi di i gingn pa plant de ri, isi, lé pa vré galman. In tan dann nout mèr l’avé poin poisson : mantèr ; in y tan nout bann vash té i donn pa bon lé : mantèr ankor… Koméla i an apèrsoi dann nout natir nana tout sort rishès é i pé ansèrv pou nout bien.

Nana ankor in bonpé shoz i pé di, mé moin la poin la plas. Sèl shoz mi di sé ké dopi dé tan é dé tan moin la pa shanjé dann ma konfyans pou La Rényon ; moin la pa shanj d’in iota !