Zédi matin, banna l’apré koz dsi bann lang kréol. Moin lé sir zot l’apré koz dsi bann zafèr intéréssan. Solman, mon tète lé pa la : mi ékout konm mi ékout pa ! Mon léspri lé dann lo vir-vir ! Zordi, moin la pans mon bann kamarad Chagos ! Zot lé pa la, épi pèrsone i mazine pa zot lang !
Zot lavé in péï, épi banna la pran : bann zanglé la loué bann zamérikin, pou fé in baz la guèr. Banna la pran zot péï, épi la détrui tout : zot kaz, zot plantasion. La tié bann zanimo, ziska bann shien. La kass zot kaz, zot simtièr, pou fé komsi navé poin dmoun a-titré la-ba.

Mon bann kamarad ! Zot i koné, na poin pèrsone lé barbar konm so bann soi-dizan sivilizé : zot i koné, sa la poin pitié pou dmoun ! In pèp, in kiltir, in lang zot i s’anfou...
Alor, dépi plis trant an, zot i fé prosé par dsi prosé. Shak foi bann zanglé i rolèv lapèl, i fo arkomansé. In zour, i tard pa, zot va artrouv zot péï. Zot va artourn la-ba Diégo-Garcia, Agaléga, Aldabra, épi zot va rofé zot vi... Chagossien, mon bann frèr, moin lé sir zot va fé roviv zot lékonomi, zot kiltir, zot lang. Zot nora si tèlman soufèr pou artrouv zot péï.

Justin