Lakey lo sit > Chroniques > Oté
Moin la perd mon paspor, mon vié paspor…
zedi 26 zwin 2014, sanm
Déza moin té rod a li, pars, kan moin la parti poz in demann po fé in not, vi ke sak moin lavé lété périmé, mi rod ,mi rod… mi trouv pa la kaz ; kan mon fanm i di a moin ke lanployé dméri la dmann a él siél na in piès didantité, an natandan, pars él i doi gardé lansiin paspor, pandan ke lo nouvo lé an fabrikasion !
Konm moin, moin na mon permid konduir ; él sé dgard otomatikman mon vié paspor.
Mé, po alé rézerv touzour mon bann pasaz dann konpani lavion, mi artourn ardmann lanployé mon paspor ; donk él i romèt a moin.
Oté, moin té èk mon frèr ; mi mèt a li si lo tablo dbor ; kosa la rivé ? Koman sa la pu spasé ? Koman in ti livré konm sa i disparé ? Sé in mistèr…
So matin, mi rosoi in SMS po di a moin mon nouvo paspor larivé ; moin na troi moi po alé trapé ; koman mi sar fé ? Normalman, mi doi arrann lo vié ?!
Bon, mi sar déklar la zandarmri, é mi aport in prèv moin la perd ?
Non, ti fé isi minm, an méri, lo déklarasion pert, rézman !
La, konm lanployé sé inn ansiinn élèv a moin, él na ka mèt a moin zéro, po in devoir moin la pa romèt, dan lé tan konm i fo !
Lot zour, té lo portmoné, avan té la klé loto, kékfoi sé lo téléfone, kan sé pa lé linèt !…
In kou, an sortan lo kabiné médsin, mi arrantr dmann a li si moin la pa lès mon sak : « atansion, lalzaimèr i ariv ! ».
Si zot na in solision -mi di pa lalzaimér viin pa- mé solman aténié inn ti pé son léfé…
Paré na dé téknik ; ma dmann mon kamarad psikolog !
Nana i di a ou, mèt touzour minm plas.
Oui, mé sa lé valab kan ou rès toultan minm plas !…La lé bien, lo boug i vé alé voyazé…é li komans par perd son paspor.
Bé koman i fé ?
Ankor, vo mié li pèrd son paspor kotrosoz !?
Justin
Bann modékri andann forom
26 zwin 2014, 15:51, sanm nicaise
po perd zafèr justin y vé dir ke out tête lé trop sarzé, repose un pé, y fé trop po out âge, mi dit pas ou
lé vié mé kan mêm , sommeil là lé réparatèr po un paké soz, moin mi donne à ou un konseil, met mêm
endroit si lé possible ; la tête lé kom un magnétophone, kan ou serch , met play plitôt , si ou met rewind
à chak fois, le bande va déroulé.