Dann tout famiy néna kozman i sirkil. Dizon sa i fé parti lo kiltir familyal. Sète-la i date bèl-az-é-bo-tan : sé listoir in onm politik dann tan Gasparin-Brunet. In foi dann sinkan, li té i artourn in kou La Rényon-lo tan fé in kanpagn pou zéléksyon, pou ramas in nouvo manda épi pou artourn dan La Frans-pars lo rès tan li téi viv laba dann Päris. Sé laba son vi téi déroul ! Sé laba li téi fé son tourné-viré !

Donk lo dépité té apré féi in gran diskour dann la lang fransèz biensir é l’avé in ta d ’moun téi vien pou ékouté-galman pou bate la min, épi téi rèss pou troizyèm mi-tan téi apèl osi lo tan koud’sèk. Donk i paré Sint-klotide, shomin La kir, l’avé in madam apré bien ékouté. Mi pans èl téi apèl Katarina, shantèz légliz, pikarok, batèz fèrblan é kan lo diskour lété fini lo bononm la parti oir alèl-li romark toutsuit in moun si lé inportan !- donk li la parti oir Katarina é l’ot san pèrd la kart, pou bien félisite lo zélu la di :« Sof kok ti di mé k’ti koz bien. »

Médam, mésyé, la sosyété figir azot in nuite moin la révé.
Moin la révé moin téi koz bien, dann la lang fransèz bien antandi. Oté, moin téi tourn la lang ziska. Mon ton téi mont épi téi dsann é lo moun téi bate la min é pa in sèl foi, in bonpé foi siouplé. Oté, lé ga, lo bann mo moin téi ansèrv, dann mon rèv-la, pou kozé ébin mi asir azot i fo doksyonèr lé gro pou an avoir lo mo konmsa. Konzigézon, dopi prézan l’indikatif, ziska sibzonktif l’inparfé, l’avé pou fé ladan siouplé. Vokabilèr ? Sipèryèr éstra, figir d’éstil ? Sa téi an mank pa sa. Ponktyasion ? Tout kalité dopi lo sinp virgil ziska lo poinn sispansyon, an pasan par lo poin virgil, d’ésklamasyon é d’konstipasyon.
Mé pasyant in pé ziska domin pou konète kosa k’la éspasé.