Oté ! Mé zami, mésyé , médam, la sosyété moin la doné lo soir-la, dann mon rèv, dann mon koshmar, dann mon somnanbilaz. Moin la doné é mi rogrète pa. Lé vré, Katarina la pa vni di amoin lo kozman moin la mark an-o la, mé noré pi…éskiz mon pardon. Kan ou lé bon, ou lé bon !

A ! Moin té kontan an avoir fé diskour konmsa la nuite. Pou koué ? Pou in sinp rézon, kan moin la lové landomin moin lété in vré biling-in pé i apèl sa bi-lang. Normal pou moin pars mi koz kréol lé o épi kréol lé ba. Mi gingn di « u », é mi gingn di « i », mi di « chwa » konm la vyan fritir i tonm dann luil sho, mi gingn, di « sssss » mi koné manyé mon sèrpète é mi koné manyé mon fosiy, mi pran tizane kolkol mé galman tizane géri vite. Moin lé bilang : la poin pou diskité la dsi mé fransé nout dé li ni shass pa bien ansanm. I mankré pa bokou pou moin gingn koz fransé mé pa bokou sé kant mèm in pé é si i mank in pé ou la poin an totalité.

Mi s’anplègn pa pars néna in kozman k’i di la pa pars in moun i koz fransé ké li lé pli intélizans ké ou. Ou i pé bien kozé épi di arienk la kouyonad-La pa antinomik. Tanpir ! pétète in zour m’a kol lo fransé dan la nuite épi m’a konsèrv ali la zourné. Pétète ! Konm pétète pa ! Alé konprann in n’afèr avèk la vi. Mé la vitèss lé shoz i sava, pétète bann médsin lé kapab opér mon tète pou mète in disk dir dodan avèk dési marké « lang bann fransé » mé mi kont kant mèm dsi zot pou pa éfas mon bilangism-sa moin la bézoin sa !

Sé avèk sa mi sort dan lé-o pou alé dan lé ba A vèk sa mi koz avèk tout demoun mi trouv dann l’shmin. Mi koz avèk yab, malbar, shinoi, kaf, mélanzé, onm, fanm, vyé, jenn. Dizon moin lé shé moin partou é sé sa k’i fo pou moin. Fransh vérité !