Céline, moin la tandi out voi épi moin la vi out sourir. I klèr out figuir. M’a dir aou fransman, si in moun i ékout pa pou vréman sak ou té apré dir, si par égzanp léspri lé pa la - sa i ariv sa ! - Noré di ou té apré rakont in n’afèr la vi ordinèr. Poitan té loin d’ète sa ! Poitan té in n’afèr ou laviv, té kapab fé mor aou.
Tousa lo kou la done aou : koud’pié, koud’poin, koud’kouto ziska. Tousa lo kou, pou kossa ? Lé vré shakinn nana son parkour dan la vi. Shakinn, i pé ète dann bonèr, ou bien dann malèr, ni pé an avoir in shomin galizé, konm in shominn’kroi... Shakinn nana son karaktèr, son fason oir lé shoz, son manièr pou fé fas son destin.
Céline, ou noré pi koz avèk la kolèr, ou noré pi koz avèk la ène, ou ossi ou noré pi souète ali la mor mé ou, ou lété solman étoné. Ou noré zamé di, le moun ou i koné dépi vinn-katran, noré pi fèr konmsa avèk ou. Koman ou i fé pou koz konmsa. Koman ou i fé pou pa an avoir la ène ? Koman ou i fé pou pa kri vanzans ?
Zordi, out famiy avèk out bann dalon, noré pi amène aou, konm i di ziska out dèrniè "demeure". Mé lété pa out sor, lété pa out déstin, out lèr té pankor arivé. Sé pou sa nou la vi aou, apré koz kèr klèr dann télé.

Justin