Oté

« Moin la vi in zangiy sète koulèr »

In kozman pou la rout

Justin / 28 novanm 2017

JPEG - 43.6 ko

In pé i di osi : in zangiy troi koulèr. Kisoi troi, kisoi sète, la pa in bon sign ditou. Dizon plito in mové prézaz. An gro, sa i vé dir, moin la vi in n’afèr i fo pa oir, in n’afèr lériskab aport amoin la movèz shans. In kroiyans ? Zot i pé kroir sak zot i vé, mé a bien ékout demoun apré rakont zistoir kan la nuite lé fine tonbé é solèy fine lav son pyé, si zot i kroi pa, mi pans i fo fèr konmsi. Pars dann in n’afèr konmsa, i koné zamé ! Moin na in z’ami, kan li oi in vizyon konmsa li fane do sèl kat koin son kaz, sansa li aroz in pé kat koin avèk do lo safran. In sort garanti si zot i vé ! Mèm si pou fé lo fyèr, li di li fé sa pou marmaye. Alé ! Mi lèss azot réfléshi la dsi é pétète zot va évite sèrtin koin la nuite. Ni artrouv pli d’van sipétadyé.