Zot i koné, issi La Rénion, kan la sézon i ariv, demoun i oi vizion. La plipar d’tan, sa i tonm moi d’zouin, sansa zilyé, dann tan i fé fré, i fé noir bonèr, kan solèy la fine lav son pyé. Alor, demoun i oi la fanm san tète, loto rouz, lonm invizib. La-ba linivèrsité, si dmoun i oi pa l’éspri, lo vizèr infrarouz, i amontr in nafèr, lé bizar épi pèrsone i koné pa kossa i lé. Donk in vizion !

I koné pa, ziska mèrkrédi apré-midi, akoz zour-la, in pti group batèr tanbour la vni dovan lo réktora. Pou kossa ? Pou dir zot lé pa dakor avèk in fason ékri kréol zot i apèl sa KWZ. Sirtou, zot i vé pa sa i tonm dan la min bann marmay lékol, akoz zot la pèr sa i détrak léspri bann zènn. Soman, ziska zordi, zot lété kont galman i amontr kréol lékol : oui, inn-dé rant banna la ékri sa dann zournal, épi la sïng bann pétission.

Oussa mi arvien déssi léspri linivèrsité, sé kan in madam, avèk son shové farfouyé déssi son figuir, la koz dann télé. Pou moin, sé la konséyèr fantome huitième kanton Sin-ni : par lo voi, par la form lo figuir téi rossanm bien. Alor, mi fé in pti konparézon rant léspri linivèrsité invizib épi lo figuir moin la vi. Alor mi di sé topète-morète, solon moin. Donkalor, moin la vi l’onm (?) invizib : sé in madam.

Justin