Sa in kozman i sort dann maloya mé pétèt zot l’apré domandé kosa k’i lé zangiy sète koulèr-la ? Sète ? Sa in shif lé mazik sa ! Konm lo zangiy li mèm lé mazik. Akoz li lé mazik ? Pars nana sète trou dan la tète. L’og l’avé sète fiy ! Samarèl nana la tèr sète koulèr. Mi ashèv dir, nana in bonpé z’afèr i marsh par sète. Tanka zangiy sète koulèr, si moin la trap inn, sa i vé dir moin la vi dé shoz i fo pa oir, konm par ébzanp sirène dan la mèr avèk moityé lo kor in fanm é moityé lo kor in poisson é lo pir dann tousala si li shant é ou la ékout ali soi li ral aou dann fon la mèr, soi out bato i bite dsi in kap é li koul dann lo. In konsèy ! Si i ariv azot in zour oir dé shoz k’i fo pa, fé sète sign do kroi é lé myé ankor si zot i tranp z’ot doi dann lo bénite. Alé ! Mi lès azot réfléshi la dsi é ni artrouv pli d’van sipétadyé.