Oté

Moin la zis anvi kriy : danzé ! Danzé pou tout nout plantaz lontan ! Danzé pou nout sivilizasyon kréol La Rényon !

Justin / 18 zwiyé 2018

JPEG - 43.6 ko

Moin la pankor anparl azot la koup kann sét’ané. Poitan la koup la fine komansé é i trouv in pé partou dsi la rout bann traktèr, sansa kamiyon, sharjé avèk kann. Kann ! Mi koné aou dopi moin lé éné. Kan moin téi fé in désin, lété in désin kann. Lo méyèr sikréri moin la mash étan pti sé kann : kann bonbon, sansa kann Moris. Zordi, lé domaz mé mon dan i grins kan mi mash in morso kann, in né kann konm i di.

Kann ou néna mil kalité. Avèk ou i pé fé tout sort de shoz. I parétré néna mèm plizyèr milyé ko-produi la kann, mé sak moin lé sir néna sink san produi i fé avèk kann a titré. Biensir mi sava pa grinn sa pou zot tout suit-la, pars na poin la plas dann mon pti modékri. Mé mi pé jir azot sa lé vré. Zot na ka alé oir dsi inernet. Zot i pé mèm lir dann Témoignages sé pa konbien l’artik nout zoinal i port la dsi é kan in pé i di kann-la, i fo ni siprime sa vèrt é sèk dann nout péi, moin mi pans sinploman : ala ankor in l’ignoran la rouv son boush initilman !

Kann, mon zami, mon kamarad, mon dalon dopi moin té pti marmaye, mi koné zordi ou lé dann danzé. Mi koné ou lé riskab disparète dann inn-dé zané. Out fin lé marké dann léspri in bann kapitalis épi désèrtin z’om politik. Mi pé trap mon sab épi alé kongn kongn in pé partou, la pa konmsa moin va sov aou. Sov aou ? Si néna poin in volonté politik mi oi pa koman i sava fé.

In sign : mi oi , in pé partou dann bann kour, par si par la inn dé touf kann, konm in plant vèrt. Konm mi oi tazantan inn-dé pyé jarniome ! Konm mi oi galman inn-dé pyé la vaniy. Sin Pol laba néna in dalon la fé in zardin éstraordinèr avèk tout bann plantaj téi fé La Rényon dopi lontan. Mé zami, kan mi oi sa, mi kriy pa viktoir, moin la zis anvi kriy danzé ! Danzé pou nout bann bon plantaz dann tan lontan ! Danzé pou nout sivilizasyon kréol La Rényon !