Konbienn foi, dann in somen ou i pé antann in kozman konmsa ? Plizyèr foi, sa lé sir ! Shak foi ou va domann in dalon si li lé bien, li va réponn aou konmsa. Sé in kozan k’i ropoz dsi in zé d’mo : dann promyé ka, « bien » sa lé an rapor avèk la santé.

Dann dézyèm ka, sa na in raport avek « in bien ké ou i posède » donk in patrimoine. In zé d’mo, souvan défoi sé lo méyèr fason pou armas dann out mémoir in kozman. Bann kozman kréol i iz, é parfoi i abiz avèk zé d’mo, mé sa sé nout fason anou.

Kosa zot i anpans ? Moin, pèrsonèl, mi fèrm mon také pou zordi ; ni artouv pli d’van.