Na dë-troi jour, déssèrtin kandida po zéléksion prézidan la répïblik, téi parl rienk lidantité nassional, drapo blë-blan-rouz. La télé la pass dann in lissé, épï la domann bann jenn, kossa zot i panss. Inn dë marmay la réponn, zot nora préfèr téi parl lidantité "européenne".
Shakenn lé lib son manièr panssé !
Jistëman, mi emré bien savoir si shakenn lé lib pou vréman. Mi emré savoir si bann proféssèr la koz avèk bann marmay sü lidantité la parl azot lidantité rénionèz. Epï lë journalist, si li lavé poz azot in sinp késtyon konmsa : lakèl ou lé an prëmyé, européen(e), fransé(èz), rénionè(z).Mi kroi, si lavé poz in késtion konmsa, lapa "européen" nora sort an prëmyé.
Bien sïr, lidantité rénionèz, sa la pa dann program lékol.Mi pans mem pa si bann proféssèr, i viendré azot a l’idé, k’nana in lidantité rénionèz.Proféssèr konm sa, i doi èt rar konm korn lapin. Ou sinonsa, zot i “pratik l’auto-censure”.
San fé in gran rézonnman sï lidantité, i pë di sinplëman : sé mon péi ki dikt amoin kèl sé mon lidantité. Epi, mon péi sé kan mi san, moin lé bien shé moin.

Justin