Matante Zélida la ékrir Justin :

Mon shèr nové, mon spès salté, rouj do fon dovan l’éternité,
Fransh vérité, mi trouv in pé i agas amoin avèk zot manyèr artourn viv konm dann tan lontan. Lé vré, moin lé pa bien jenn, mé mi oi pa pou kosa moin va artourn an aryèr… arfé tizane konm dan tan lontan, manj bann z’afèr i pass pi dann la modèrnité, songn son kor avèk kékshoz ou i koné fout pa koué nana anndan. L’avé in tan pou tousala ! Zordi sa i pass pi pars lé pi dann l’ord di zour, lé pi la mode, é ni vé ni vé pa zot tan la fini. Moin, mi vé viv in manyèr modèrn, é mi souète mon famiy i viv konm moin l’apré viv zordi. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr,
Ala ké astèr, ou i tourn lo do lo valèr nout bann z’ansien, ala lo tan sak téi guid anou dan la vi i fo anvoy fèr foute.. Poitan ! Mi sort lir in n’afèr dsi mourong é d’apré sak moin la lir sa sé in n’afèr bien itil pou la santé d’moun, l’alimantasyon bann marmay, in bon téknik pou rétabli la santé... Baya dann mourong na plis dé shoz ké nou pansé ziska zordi : vitamine A, li ! Vitamine C, li ! Magnéziome, li ! Kalsyome li !
Figuir azot bann médsin l’imanitèr la fé in réjime avèk sa pou bann demoun shéti, dézékilibré afors pa manj konm k’i fo. La fé in doz fèy sèk karant gram po rétabli la santé marmay. Dann désèrtin l’androi la plant par kou dis_kinz mil pyé mourong pou dépane in bonpé vilaz. é lo rézilta lété sak demoun té i aspèr, é mèm plis ké sa ! ;.. Moin pèrsonèl sa i étone pa moin, pars moin la vi soign bronshite avèk kataplas l’ékors mourong, moin la vi bouyon déblok in konstiasyon d’ui zour, moin na sirtou dan la boush lo gou guèp griyé lo flèr mourong ; donk mi ronyé pa ! Myé ksa mi rokoné la valèr bann plant la. Moin lé fidèl bann sogré nout z’ansète. Tok ! Pran sa pou ou !

In kozman pou la rout : "La shyas i ariv a shoval é li ropar a pyé !"... mi pans sa olé bien vré pars lé vite fé tonm dann malizé, kisoi pou la santé, kisoi pou la monaye, kisoi ankor dann la trankilité d’famiy. Mé sinploman, pou rétablir lé sjhoz i mète lontan, lontan. Pèrd travay ? in néstan. Trouv travay ? na dlo pou koumlé dsi l’pon. sof si na in mirak, mé in maladi i pran son tan pou alé. An prinsip lé konmsa ! Mé na kant mèm l’éksépsyon... Fé shof zot koko, fé bouy zot matyèr griz, zot va trouv bann ka konmsa.