Mi pans zot i koné lo maré poitevin. Mi sipoz zot i koné sa sé in n’afèr lé laba dann La Frans é nana in gran biodivèrsité.Sanm pou moin, zot i doi konète in zour gouvèrnman té i vé fé pass in gran l’otorout ladan, par an par. Mé bann zamouré la natir la lité pou konsèrv in paradi konmsa…Parmi sak la vanjé l’avé madam Ségolène Royal, nout minis l’ékolozi zordi é dopi plizyèr moi, sak l’alyans la ékri ali épi li la pa réponn arien ziska zordi.
Pétète la natir La Rényon, sa i intérès pa li pli k’i an fo. Pétète li di na d’ot ké èl la pran so désizyon lès fé lo rout dan la mèr avan k’èl l’arivé donk sirman èl i pans èl i sar ar pa koins son doi dann in n’afèr konmsa. Poitan, konm minis l’ékolozi, mi trouv sa sé in n’afèr i doi intérès aèl. Pou kosa ? Pars la natir lé dann danzé. La prèv ? Tienbo azot bien zot va oir tout sak lé riskab arivé :
Kèl zanimo i vien landroi i sa fé la rout an mèr ? Dabor inn, nana bann baleine a boss i vien la pou fé zot pti.Arzout èk sa, shantyé la va fé d’tor lo gran dophin, torti vèr,torti inbriké, pétrèl baro in léspès dann danzé déza. Armète ankor la dsi bann ban lo sab, épi tout kalité léspès la pankor fé lo rosansman. L’èr-la, lé kant mèm difisil konprann pou kosa gouvèrnman sosyalis, la min dsi lo kèr la donn tout l’otorizasyon pou détrui, kasé brizé é mèm pa obliz romète lé shoz an plas.

Sa sé La Rényon. Sa sé dann l’oséan indien. Poitan, momandoné, madam royal la fé tout son nésésèr pou blok in l’otorout dann maré poitevin pou sov in pti kalité batrasien, in gronouy si zot i vé. Moin lé pa kont zot gronouy, mé rouvèr in pé lo zyé dsi la natir l’androi ni arète osi, mèm pou fé in rout va kout plizyèr miliar.