Sa i vé dir lo moun i ézit é li koné pa kosa li sava shoizi. I pé z’ète « rant dé kèr » : la i vé dir ou i koné pa kosa ou i doi fé. Rant dé ? Sa i ariv pli souvan ké zot i kroi : « mi maryé », « mi maryé pa » ?

Kalkil in pé lo traka d’in moun kan li koné son maryaz lé marké pou tèl zour é konm di lo kont, li lé ankor dann l’indivi. Mi sava voiyazé, mi sar pa ? D’in koté mi èmré alé, dé l’ot mi ézit bonpé. Lé sinp, dann in ka konmsa, ou i avans pi, ou i rokil pa non pli... Mé sak i avans pa i rokil konm in pé i di.

Kosa zot i anpans ? Arien ditou ! Pou mon par, mi fèrm mon také é sirman nou va rotrouvé.