Fransh vérité m’a dir azot moin lé kapab-mi yèm mèm-okip bann zafèr tératèr é mi pans sèryèzman bann zafèr-la i korèspon mon nivo, mon kapasité si zot i vé. Si tèlman kan i débate bann zafèr konpliké kisoi lékonomi, kisoi la syans, kisoi la médsine moin lé bon pou pran dé kashé pou fé pass mon mal dé tète.

An parlann la médsine m’a dir azot fransh man sa sé in téknik bandé sa. Par ébzanp, pou sèye in médikaman néna in protokol. I pran, paré-t-il in groupman néna troi san pèrsone dédan épi i mète sa dann in gran lopital : i done moityé lo vré médikaman pou tésté é la moityé i donn sak i apèl in plasébo, kaziman in pissa bib. Apré i avèye lo rézilta é aprésa i kont :
Si dann an parmi sak la pran lo vré médikaman san karant la fé in bon l’éfé, é pou lo dézyèm léshantiyon néna solman in vintène la donn in bon rézilta é si néna lo mèm rézilta plizyèr foi, pandan dé zané, va di lo médikaman lé bon. Si sé lo kontrèr va di : « fout sa dann la poubèl pars sa i ansèrv arien ! ».A moins in mali i désid ramasé pou tèst dsi d’ot shoz in zour !

Zot va dir amoin, pou kosa sa i trakass amoin. Pars zot i koné partou ousa ou i pass i fé sign aou papyé par dsi papyé ou la mèm poin lo tan lir. Arzout èk sa kan i done aou lésplikasyon ou i fout konpran pa. Alor, mazine in pé mi sava l’opital é i fout amoin in trètman. Bon pou sa mèm ! L’èrla moin sar apré maziné, kalkilé, rofléshi, ganbèrjé dann mon tète pou konète in n’afèr : la i done amoin lo vré la, sansa lo fo ? Moin lé dann group médikaman, moin lé dann group plasébo ?
Mésyé, Médam, La sosyété kan mi di azot mi yèm okip zafèr atèr-atèr plito ké bann zafèr konpliké, zot i konpran mi fé pa sanblan. Dan la vi mèm moin lé konmsa. Sé dir si dopi dé somenn é dé somenn, bann koko fromaz l’apré diskite bann zafèr difisil dann la télé, é moin aoré fé la bétiz ékouté, Donk zot i konpran pou kosa dann la profondèr mon konfinaz moin lé trakassé. Sèrv kobaye ? La pa mon shoi sa ! Fransh vérité !