I di mon journal i sar parèt su internèt é mi ginyar pu lo papié tou lé jour kome avan ; ben la koman mi sar débrouyé ? A zot pétèt zot na lordinatèr zot kaz ? Zot lé aboné in fournisèr ? Zot na kapasité larzan é osi moyin intéléktièl po lir tousa la si in lékran !
Mi pans tout domoun na poin sa ditou la kaz, koué i sar fé ?

Sak na marmay i sar lékol , na in tablèt, in portab, i giny rod sa an tapan sé pa koué in nafèr kome www.temoignages.re, zot va kontinié awar zot informasyon o kotidiin ; mé sak tout bann marmay fine pran son partikilié, fini marié, fini alé ress ek son konzoin, loin ?…Vey pi faktèr non pli ?

La mon labitid i sar sanzé konplètman !

Moin k té i yinm konèt nouvèl bann plantèr, bann travayèr, sak la po fé in grèv parsi parla, nouvèl politik, sak i spas isi é la dann tout vil mon péi. Avoir in pé zinfo si bann manifestasyon ; si na in minis larivé ; si la sanz préfé ; si na in fèt par la ; minm in lanons légal ; mi konétra pi ariin !

Po asévé, biinto na zéléksyon ; koman ma konèt ou sa na rénion ? Po sak i ginye pa alé ékouté, li pé lir lo programe, san konté foto.

Moin nora pu mon zournal dan la min, mèt dan mon pos, port a li dann mon karo kann si mé vé lir a li dann mon bitasyon ! La i sanz mon vi ! Sé sa lo modernis ! I fok sé moin i adapt o nouvèl téknik linformatik !

Si mi koné pa lir, i fo mi sar aprann alor ?!
Koman justin i sar fé ? Zot na in solisyon ?

Justin