Matant Zélida la ékrir Justin :
Mon shèr nové, mon spèss salté, rouj-de-fon dovan l’étèrnité, si mi konpran bien zordi zot i vé zoué l’indyanoséani kont La frans. An touléka sé sak mi konpran kan mi oi zot i pran parti pou in spèss siro banna la fé dann Madégascar i apèl lo Covid-organics-épi Prézidan Madégaskar i fé, d’apré sak mi kroi la piblisité pou siro-la - alé oir zot i koné bien l’érop i vé pa oir zafèr-la an blan ni an noir, an son konm an farine, ankashé konm an siro… Lé normal pars pèrsone i koné pa kosa néna ladan konm konpozisyon é mi mazine o moins li gingn ar pa fé arien kont lo virus, opir li lé kapab agrav lo maladi. Antouléka, moin mi profèr pa gingn lo maladi-mèrsi ségnèr Marie, ma bone mèr !- é si mi gingn mi profèr laba dan l’érop bann laboratoir la fine trouv in bon médikaman pou vanj kont lo virus mé médikaman malgash protèj amoin ségnèr. Tok ! Pran sa pou ou !

Justin la fé pou répons :
Mon vyé matant, mi pé rakont aou kékshoz : kan moin lété pti baba l’avé in pti voizin mèm laz lo lé son momon lété kontrèr alor mon momon téi fé tète ali an mèm tann ké moin . Nout dé li téi partaz lo lé mon matèrnèl. Lo marmaye la komans alé pli bien, mé oila in spèss guérisèr k’i géri pa, la di sa la pa in n’afèr pou fèr, li la donn in tizane fé avèk la bav léskargo, kataplas limon, zi d’l’aye é d’ot koshoneri ankor, épi tout sort la kouyonad. Si tèlman mon frèr d’lé-mi di konmsa !-lé mor.
Sa sé pou domann aou si ou i pans laboratoir Madégaskar lé ankor dann tan l’aryérasyon konmsa. Moin pèrsonèlman mi pans pa : an kontrèr mi pans laboratoir-la lé modèrn, bien finansé avèk l’ède étranjèr. Lo moun la diriz lo travaye sé in vré savan i sort La Répiblik popilèr lo kongo. Mi pans galman son médikaman i sort pa sou galé mé sé lo rézilta d’in vré travaye. Alor plito ké interdi lo médikaman mi pans noré té pli proférab l’érop i pran bo n l’informasyon. Apré i oi ! An touléka i di la fine ging n bon rézilta dsi la malariai. Akoz pa l’ot salté k’i kour zordi ?
An touléka, mi pé dir aou épi tout out bann sanblab : si i ariv ké bann madégaskar la trouv vréman in bon médikaman éfikas é tout é si lé posib anpèsh bann kapiytalis fé dé milyar é dé milyar ébin moin sar bien kontan pou lo péi, pou son bann savan é pou sak zot noré trouvé si zot la trouvé pou vréman. Tok ! Pran sa pou ou !