Mi koné pa si konm moin zot lé gro konsomatèr la radio, pars si zot i ékout souvan in radyo pèrkal, zot la sirman antann kozman moin la mark an-o la é pa arienk in kou siouplé. Mé moin la fine romarké la pa toulmoun néna lo mèm kapasité pou pasyanté. In pé, d’apré sak mi romark, zot pasyans lé kourt. D’ot la pasyans lé pli long. Dovan in sityasion konmsa si ni rofléshi in pé, pé sfèr ni romark nout l’inpasyans la pa zistifyé pou vréman. D’apré sak moin la romarké néna désèrtin moun lé san pasyans pou tout : in pane kouran i fatig z’ot tété ! In l’anboutéyaz é zot lé paré pou kriyé ! Poitan, nout tout i koné bien : la pasyans i géri la gal . Alé ! Mi kite azot pou rofléshi la dsi é ni artrouv pli d’van. Sipétadyé !