Na dé-troi zour, moin lété dann in rényon é tou-d’in-kou in kamarad la poz in késtyon dsi la traïzon. Li la di, konm de koi, pou kosa lo parti i domann anou-bann militan - fé la kanpagn pou iks, pou igrèk é mèm la pèrsone la gagné-si èl la gagné !-i ariv in n‘èr i bril la paye avèk nou é tazantan i sava dann in kan bann kont-parti. In grav késtyon pou vréman !

Pou kosa in n’afèr konmsa i ariv ? D’abor I fo konprann la vi I shanj épi sak in moun i kroi li pans zordi, lé posib li pans pi la mèm shoz domin. Dézyèmman lo parti osi li shanj : li nana konm baz son prinsip, son bi, la parol doné, mé konm la vi I shanj I fo li shanj galman. In l’égzanp : lo réshofman klimatik ? I pé pa fé konmsi li égzis pa. In n’ot l’égzanp : la démografi ? I fo kont sanm li. Lo mond k’I antour anou ? Li la bien shanjé é sa sé in n’afèr I pé pa zapé sa.

Astèr ni pé mazine in moun i vien avèk nou é li konpran pa bien nout prinsip é sirtou-konm di lo kont-sa la pa lo motèr k’i fé marsh ali, sa la pa vréman son karbiran. In zour i ariv, li ronons nout bann prinsip épi li bril la paye avèk nout parti. Anshèv avèk sa si li pans na pi d’pouvoir, na pi plas z’élu, li pé gingn avèk nou pou kontant son l’apéti individyèl…L’èr-la, i rès ali in n’afèr sé ralyé lo bann kont-parti é bril la paye avèk nou..

NB Sa i anpèsh pa nou ranfors nout konviksyon, amélyor nout l’analiz, bien mark lo domène l’intéré nout pèp-épi l’intéré bann pèp dan lo mond - ki konsèrn anou épi l’intéré partikilyé malfondé i konsèrn pa nou konm parti ; I anpèsh apa nou partaj lo plis posib nout z’idé.