Ala, sanm pou moin, in kozman k’i bate lo rokor la kouyonis. Biensir, i pé dir, sé in kozman pou mète la momon anlèr é pou dégrad in pé la valèr lo papa. Ni pé pans konmsa mé ni pé domandé si sé in bon fasonn oir lé shoz. Touléka dsi lo plan syantifik sé in kouyonad : zordi i pé bien konète kisa i lé lo momon é kisa i lé lo papa sinploman par l’ADN. Avan té i n’ot afèr : figir azot moin na dé kamarad lo ziz la kondane tou lé dé a pèy in pansyon pars lé dé, d’apré sak mi koné, té i frékant lo mèm fiy. Mi koné mèm, dann tan, in fiy la dénons lo fo papa pars li l’avé l’arzan donk li té kapab donn in bon pansyon plito ké lo vré papa, pars i paré té in vorien. A par k’sa, mi koné pa si lé posib - konm i di - pran in ranplasann pèr sof pou akonpagn in fiy dsi l’otèl dann lo ka d’in maryaz si lo vré pèr lé mor, dispari, sansa déklaré absan. Astèr, mi arète in kou pars la pa nésésèr fé travaye lo koko an patinan é si kékshoz initil, i vo myé pa gate son tan la dsi. Alé ! Ni artrouv pli d’van si zot i vé bien.