Zot lété z’afrikin, z’indien, Malgash, sansa zot téi sort sinpleman dann vant zot momon. Nana in loi la di bann blan i gingn pa fé travay dir akoz solèy lé sho. La parti rod azot landroi zot lété épi l’amène azot pou angrès la tèr avèk zot gro transpirasion.

Lo loi la di, i pé vann azot par inn, par paké, o poi, épi a l’ankan. La di osi, i pé partaj azot rant zéritié konm i partaz ninport ékèl bien. La vann azot par inn, par paké, o poi, a l’ankan épi la partaz azot rant zéritié.
Lo loi la di, na l’droi tap azot koud nèr d’bèf si i roprosh azot in n’afèr, na lo droi moung azot pli for si i sava maron, si i sava volé, si i port la min si in blan : koup lo bra, koup la zanm, roué, ékarté, pandiyé. Zèt lo kor dan la voiri.

Solman, la di, i fo bien nouri azot konm i donn bien bèf lo son, maskad avèk maniok bouyé pou gingn la fors pou travay douz èr d’ran. Épi d’ot é d’ot zafèr ankor té i fé k’zot té zésklav.
Lo fra, obli pa nout koté zésklav ! I fo pa obli sa !

Justin