Kèl lé pli danzéré solon zot ? In z’ami ou sinonsa in z’ènmi ? Mi pans, désèrtèn foi, i fo ni kalkil in kou. Pars in z’ami kouyon lé pli danzéré k’in zènmi la tèt lé vid. Dan lo promyé ka, lo z’ami an késtyon lé riskab di ou bien fé in kékshoz va fé aou lo tor. Dan lo dézyèm ka, out z’ènmi i kroi fout aou in mové kou, alé oir li l’apré rann aou sèrvis. Tout fason, konm di Kréol, « Moun kouyon lé danzéré ». Pou kosa ? Pars lé posib li va fé kékshoz va dévir lo do avèk out z’intéré, avèk son z’intéré, va tourn lo do avèk la koz li di li vé défann. Sa lé vré dan la vi, sa lé vré dan la sosyété, sa lé vré dan la guèr konm dan la politik.

Pou kosa mi di sa zordi ? Zordi mi di sa an pansan bann sosyalis. Zot prézidan lé o pouvoir, zot na in gouvèrnman lé san pour san dakor avèk zot, poitan zot i aplik pa la politik zot parti épi zot gouvèrnman kèr klèr, konm i pé di osi, la flèr dann bout kanon fizy. Zot i vé in prèv ? M’a donn azot. Lo minis l’édikasyon la désid fé la somèn kat zour é d’mi pou pa tro fatig bann marmay épi pou donn azot plis lo tan pou kapar bann konésans. Té i pé fé sa la rantré 2013, é pou la rantré 2014 pou sak i trèn lo pyé. In gran komine konm Sin-Dni, lo mèr lé sosyalis, la komans par di li sa fé sa, épi li va fé dsi la moityé la komine, épizapré li rann lé z’arm.

In n’ot l’égzanp : gouvèrnman la prévi sink mil kontra l’avnir pou La Rényon. Ziska zordi, la sign solman ui-san. Lé vré, bann z’advèrsèr va di, gouvèrnman i di sa, mé li mèt anou dann in vré gob pars ni oi pa la suit, épi nou la poin moiyin fé bann dépans-la. Bann z’ami lété pou sa zot é san pour san siouplé, mé zot la pa tro bouzé. Vérité vré dann Paris é la pintir La Rényon ? Sak lé vré, sé ké bann sosyalis la pa tir palto pou défann la politik zot gouvèrnman.

Désèrtin moun i anprèt Voltaire in kozman, mé i paré lo promyé la di sa sé in roi la Macédoine l’ané 226 avan Zézi Kri. Kosa kozman la té di : « Ségnèr, protèz amoin kont mon bann z’ami, moin m’a okip mon bann z’ènmi ».

NB : François, ou i pans pa sa in bon fil roz pou ou ? In bon tik-tak pou navig an parmi bann galé pointi ?

 Justin