Sa i rapèl amwin listoir in l’Anprèr romain té i apèl Vespasien. In zour ké son bande kèss lété in pé vide é konm l’avé bézoin, li la désside instal bande kabiné in pé partou dan la vil é li téi fé péyé biensir. Son garsson la roprosh ali pars bande kabiné téi i pi é li téi trouv té pa moral tir parti la féblèss demoune-in l’anvi d’ch... é wi pèrde oute dignité- mé kan lo bande panyé pyèss la komanss arivé, Vespasien la tranpe son min d’dan é la fé koul sa rante son doi an dizan èk son garsson lo kozman mwin la marke an-o la.

Dann tan-la la fasson lo bande zéta pou tir o flan bande zadministré lété artizanal, é koméla dizon lé kazilman indistriyèl mé sa sé in n’ote sobatkoz.

Mé pou kossa mi di sa ? Pars dann zoinal Maurice, mi sorte lir in lartik dsu l’élvaz épi la kaptir bande sinz pou bande laboratoir dann l’érope épi l’amérik. Bien sir sé soufranss pou bande zanimo, mé larzan fète é fourni pou bande fèrm i élèv lo sinz é galman pou bande shassèr dan la foré, épi pou bande moune i travaye dann lilégalité. Gouvèrnman pou l’instan i réazi pa mèm konte bande shassèr dann l’ilégalité.

Mézami, fransh vérité moi dèrnyé mwin la parti Maurice é bato l’amenn anou lo débouché grande rivyèr d’lest é dann pyé d’boi nou la vi bande sinz é mi pé dir azot néna in koté imin shé bande zanimo-la é mwin téi arète pa panssé sak lété i mène in vi inpossib dann bande pti kaj é aprésa téi sibi bande zéspérimantassion pou noute bien k’i di.Pou noute bien... Ala koman ni trète noute lointin paran.

A bon antandèr salu !

NB. si zot i vé alé pli loin dann la konéssans sète afèr-la alé dsu zot téléfone zot va ziz par zot mèm.an parmi bande sinz néna lo makak gran ké, é sète-la si i kontinyé va disparète-dann danzé partou dis la tèr.