Mézami, mon bande dalon,

Dopi in bon koupe de tan, mi antande dann radyo épi dann télé demoune apré jakassé dsi lo pri bande marshandiz. Bien antandi demoune l’apré souplègn par raporte a sa… Antanssion ! Mi krétike pa, mi antande sinploman é mi konpran sak lo moune i di, sirtou kan mi koné i manke azot vin santime pou fé in fran, sansa konm téi di ankor dann tan demoune i koné p koman i fo fé pou zoinn lé dé boute par l’milyé.

Ni koné la kantité d’moune lé dossou pa d’porte la povrété é mèm konbien demoune karéman mizère : mwin la antande dire néna par-la disète pour san d’moune lé konmsa, é sar konmsa toultan k’i déssid ar pa mète la mizèr orlaloi é kondanab lo bande résponsab de sa. Dsi lo plan lokal, rézyonal, nassional épi mondyal. Toussala mwin la fine ékri é mi panss i fo fé rante sa dann la réalité d’la vi.

Lapa toussala, in pti listoir kant-mèm : dimansh mi désside alé ashté in pain fantézi é zistoman i tonb bien pars dann mon tourné-viré mi pass dovan la boulanzri. Mi rante dodan épi mi oi mon pain... Bon n’afère lo pri la pa monté. Mi ashté vite inn avan lo pri i shanj sou mon zyé. Mwin néna in sak é mi mète dodan : péyé, fini ! Mwin lé parti. Néna in n ’afèr i déranj amwin in pé, konm k’i ddiré i klosh pa : dabitide lo pain-la kan mi mète ali dann sak, son koko i sorte déor, é zordi non. Mwin la pa mète lo tan pou konprande : Mwin la kant même pa tyé kouyion pou pran son plass !

Mon pain l’avé pa shanj lo pri, li l’avé solman shanj longuèr é biensir lo poi… Ziskatan lo pri va shanjé pou vréman si i kontinyé konmsa.