Oté

Mon pansé : alon bour lo fèr pou mète nout péi anlèr

Justin / 11 avril 2019

JPEG - 43.6 ko

Moin la rogard dsi Face Book épi moin la vi in n’afèr, sanm pou oin lé bien intérésan. Si moin la konpri sak lo dalon téi vé dir, li propoz bann rényoné in sort chalanj pou mète nout dévlopman anlèr. Li fé in apèl, li domann kisa d’isi l’ané 2021 lé paré pou pran désèrtin zinisyativ pou dévlop lo péi.

Pou kosa sa la intérèss a moin bitanblan ?
Sinploman pars moin la touzour bien émé parl dévlopman nout péi épi fransh vérité avèk mon parti moin la partisip in travaye konmsa é pa arienk in foi. Si moin l’avé pou rokomansé mi pans mi bisré ankor in kou. Kansréti pou propoz bann jenn l’antropriz kékshoz pou fèr pou fé avans nout péi.
Si zot i konétré koman moin té fyèr kan moin la vi dann facebook désèrtin l’apré fé in l’izine galabé dann Sint-Sizane. Moin té fyèr pou in bonpé rézon mé sirtou pars moin lé d’avi nout péi i pé mète ali dann shomin nout dévlopman é firamézir tir nout popilasyon dann l’anboulkidi.

An pliskésa, moin néna touzour dann koin mon koko lo plan nout parti avèk son volé résponsabilité-l’otonomi, son fonds dévlopman épi son bann séktèr pou dévlopé. Dé foi, mi rèv, arpran lo plan dévlopman nout parti anrishi ali, travaye ali, pou fé dé sort noute zénèss i arète dézèspèr la vi dsi nout pti galé dann loséan indien.
Lé vré nou lé pti-pa plis 2500 km2. Lé vré nou lé an montagn avèk sinploman in pti plène litoral. Lé vré nou la pankor avans dann nout révolisyon indistriyèl, mé larzan i mank pa nou ! Mé lindistri la konésans i mank pa nou ! mé la matyèr griz nou néna de koi ! alor ? Alor pou moin nout dévlopman lé posib é la pa pars in pé-bann néo-i mète zanbèk pou anpèsh anou avansé ké ni pé pa avansé.

Alor kan lo dalon i di : alon mète o poin de koi dévlop nout péi ziska l’ané 2021, moin na in sèl pansé : alon bour lo fèr pou mète nout péi anlèr.