Dé foi mi antann demoun apré di :"Bann shif ? I pé fé dir azot ninport de koi !". Konmsi bann shif lété in sort pat-a-modlé : ou i pé donn ali la form ou i vé. Pou di la vérité, sanm pou moin, avèk bann shif ou i pé tir lo portré la réalité. In légzanp ? Tou lé moi nout zournal i sava shèrch dann bann shif l’INSEE épi i fé lartik la dsi. Moi an moi, ni an apèrsoi nout péi lé bon po figir dann gran liv bann rokor. Ala in ka lé bien intérésan, mé lé bien tris galman pars de tou-tan i parl l’égalité é l’inégalité rant bann Rényoné lé plizanpli gran.

Alon rogard lo ka dis pour san bann Rényoné an parmi bann pli rish. Kisa i lé so dis pour san la ? Sa sé bann moun i gingn plis dé mil sink san vin éro, par moi épi par pèrsone. Pou in koupl dé pèrsone rant la-dan i fo lé dé i gingn ansanm plis sink mil karant éro par moi. Si sé in koupl avèk dé zanfan, i fo gingn plis sète mil sink san éro par moi. Sa i tir pa sou la pat shoval sa ! Donk sa bann moun nana lo moiyin, é oplis i sava, oplis l’inégalité i agrav moi apré moi, ané apré ané. Astèr ni koné bien sinkant pour san bann Rényoné i viv dsou lo pa d’port la povreté. Oi zot mèm la diférans ! Si zot i oi pa bien alé rogard zot fish do pèy, sansa zot tèstasyon Rsa, pti rotrète sinonsa bann minima sosyo, é zot va rann azot kont par zot mèm kèl diférans nana rant la rishès é l’okisité.

Arzout èk sa sé in n’afèr lé bien voiyan pars si bann rish té i viv dann zot koin épi bann ti kolon dann zot kartyé, pétète noré pa tro vi léskandal, mé sa i viv inn koté l’ot, dann in mèm vil, dann in mèm katyé. L’èr-la, lé fasil pou konprann koman so l’inégalité lé voiyan konm in né dann milyé in figir, la pa moiyin nyor ali. Na pa moiyin éskiv ali. Donk, sa in réalité dir pou bann ti-kolon siporté é pou bann rish zot i pans sé zot kouraj é zot l’intélizans é pètète zot boté l’amen azot ète rish… Boudikont i fé pa di bann shif n’inport de koi, mé bann shif sa na tète dir. Sé sa la vérité !

Justin