Si tèlman ké zordi mèm lésklavaz étan aboli, mèm la loi départman étan voté la loi réjyonal étan apliké, ni rèst bayoné par lo pakt kolonyal épi sak i rèst dsu pakt-la. Poitan kan lo mask té randi obligatoir, néna demoune friké la désside fé vni bande mashine pou fé mask si tèlman noute réspirassion lété bloké par bande mask-la. In pa avan zot i kroi ? Colbert la du rotourn dann son tonb.

Lo tan lo pakt kolonyal lété fini ? Momandoné mwin la kroir sa.

Mé oila, kan l’ariv - kan i ariv - lo zistoir d’luil mwin la di alala lo pakt la rotourné. Pou kossa mi di sa ? Pars si nou la antande dann télé bande plantèr la franss la désside plante gran-gran karo tournsol épi fabrik zot mèm zot luil. Zot ! Mé pa nou.

Koman ésplike in kékshoz konmsa ? Ni gingn ziss plante in pé pistash pou fé griyé sansa pou fé bouyi mé pa assé pou fé do luil. Koko nou néna mé ziss assé pou la shapèl sansa pou fé bonbon. Antouléka, la anparl lo pri luil — I anparl ankor — mèm si néna mé a kèl pri mondyé-ségnèr ! Zordi ankor lite doluil sé kat éro, mèm pliss néna dé foi alé oir avan lété moinss dé éro. Luil-la i sorte déyèr solèye don ?

Mézami zot i panss pa si nou l’avé issi shé nou, in pti pouvoir pou déssidé, an dë tan, troi mouvman nou noré gingn plante kissoi tourne-sol, kissoi pistash, kissoi dé koi pou fé nout luil… Osinonsa nou l’avé pèr défin Colbert téi vien ral dsu noute doi d’pyé la nuite ; sansa si bande fantome la franssité té i vien anpèsh anou dor somèye trankil.

Mon péi bato fou, oussa banna la pou ral anou ? A bon ékoutèr, salu.

Justin

*Parol fondkézèr Axel Gauvin, mizik Ziskakan.