M’a komans par rapèl azot in dé kozman Sankara : in zour li té minis dann in gouvèrnman son péi li la done son démisyon apré avoir di : « Malèr pou sak i bayone lo pèp ». In n’ot foi li la déklar konm de koi li la mète atèr son kostim oksidantal pou li abiy avèk lo boubou son bann z’ansète. Parl pi kan li la réprimann prézidan Mitterrand an piblik.

Dann son bann diskour li té i dénons lo kolonyalism épi lo néo-kolonyalism. An parmi sète lo pli prézan é lo pli ménasan pou son péi sète La frans pou sak èl té i fé dann L’Afrik. Li la dénons galman bann réjime kliyan lo néo-kolonyalism konm sète Lo Mali apré l’Asasina Modibo Keita, sinonsa sète La kote d’Ivoire l’avé lans inn-dé l’opérasyon militèr kont lo burkina avèk l’ède La Frans.

L’ané 1986, li défann lo droi bann pèp pou manz konm i fo, boir konm i fo é z’ot droi an avoir in bon l’instriksyon… Dann tan-la li pass pou ète in shèf l’afrik progrésis kont sak bann politolog i apèl l’afrik modéré - dizon l’afrik kliyan bann néo-kolonyalis. Ni pé azout ankor li la sèye afébli la sosyété tradisyonèl burkinabé pars té i oprime lo pèp. Li la lans bann kanpagn vaksinasyon é li la antroprann in kanpagn pou lite kont l’analfabétism.

In détaye pétète, mé li la mète an vant lo bann voitir d’liks lo gouvèrnman son péi l’avé fé ashté é li la fé ranplas tout lo bann l’oto par in bann renault 5... An mèm tan li la pran l’abitid fé plant in pyé d’boi shak foi l’okazyon i prézant pou lite kont l’avans lo dézèr. An plis késa pou alé l’ONU, li té i pass toultan par Harlem pou fé in diskour…

Konm zot i pé maziné lo tan Sankara lété in tan pou bouzé mé in tan té riskab ète kourt é sé sak nou va oir proshin kou.

(La pankor fini)