Mi ansouvien, kan moin lété marmay katéschis, lo prèt èk son komité d’paroiss la roganiz in défilé. Shakènn téi port in bouzi alimé avèk in protèz an papié, épi tout téi shant, falé antann sa. Té in gayar zafèr, tousa bann bouzi alimé dan la nuit.

Mon momon lété diréktris lékol dann in kartié, nou va apèl lilète pandiyé, pou la komodité. Son ladzointe lété ki komann in pé la défilé, épi téi shant in manièr ou té blizé romarké èl té la... Alor, mon momon la pa vni la défilé èl, épi èl la di amoin : « Kan ou sé in linstititris laïk, ou fé pa romark aou dann in n’afèr konmsa ! ». Poitan, mon momon, mi pans té in bone krétiène, la fé fèr anou nout kominion, èl mèm téi sava la mèss kan èl téi gingn lo tan épi lo kouraz.

Zour-la, moin la konprann, pou èl, instititris laïk, sa lavé son sans : lété konm in vokasion pou èl sa... Alor, kan mi aprann prézidan Sarkozy la parti la-ba, dann Rome, pou gingn lo titr manèv légliz*, alor mi kalkil mon vié momon. Kosa èl nora di, kosa èl nora pansé. Mi koné pa son parol égzak, mé son pansé, sa mi koné. Sak moin lé sir, sé k’èl nora pa bat la min pou sa.
* Le Président Sarkozy a été fait chanoine d’honneur par le Pape Benoît 16.

Justin