Oté

« Mor isi, arlèv Madras »

In kozman pou la rout

Justin / 26 novanm 2019

JPEG - 43.6 ko

Médam, Mésyé, La Sosyété, koz èk moi sé koz èk in kouyon-sé o pyé d’lo mir k’i oi lo mason. Mi pans zot la konprann vitman kosa nout kozman zordi i vé dir. Li vé anparl bann moun i kroi la métempsychose-métanpsykoz si zot i vé bien. In sistèm i vé ou néna plizyèr vi : ou i viv plizyèr foi é ou i mor plizyèr foi ziskatan ou i fini par ète kaziman parfé é so kou isi ou i trap lo nirvana. Lé ga, mi vann konm moin l’ashté mé sa i rapèl amoin in zafèr : Mi souvien in madam lété komandèz vèye pa koman, é son bononm kaziman in bonbon koko té i di aèl souvan défoi kan èl téi pik in kriz lotoritarism : donk li té di : « Ma fiy, ou néna ankor kék vi pou passé avan d’ète in moun ! ». Sé dirazot si lo fanm lété rousté mé lo bononm téi di sa sinploman konmsi li té apré résite son krédo. Anfin, inn konm l’ot la parti é mi koné pa ousa inn é l’ot lé randi koméla, dann kélyèm vi zot lé fine arivé mé si lé vré mi pans lo bononm té pa loin fini son parkour é lo madam l’avé ankor pou ralé… Mi lèss azot rofléshi la dsi é ni artrouv pli d’van. Sipétadyé !