Madras, kossa i lé ? Dabor sé in vil, épi sé in kalité tissu, mèm té in lang olèrk di tamoul. Antouléka Madras lé dan l’Inn… Mézami zot i koné la vi bann zangajé zindien issi La Rényon lété pa la vi dann in paradi ; mal péyé, mal nouri, abiyé an langouti, ésploité konm pa possib, défoi dépitassion téi pran banna.

Sitèlman zot téi panss la mor, é konm zot téi kroi zot l’avé plizyèr vi i ariv ké zot té pass o zakt. Mon granpèr la rakonte amwin momandoné sa lété in vré élépidémi é bann zangaziss téi pèrs lo zyé bann pandiyé tèl sorte la pèr rolèv avèg dan l’Inn la kal in pé lo mouvman.

Vré, pa vré, mi koné pa mé mi panss lé possib. Antouléka sak mi koné sé ké Langlétèr l’arète lo mouvman zangajé é sé sak ni fète toulézan lo 11 novanm kan ni sava Lazaré.

Alé ! Mi kite azot é ni rotrouv pli dvan, sipétadyé.

Justin