Konbien foi, koméla, mi antann dir kozman-la é mi koné pa pou kosa in malédiksyon konmsa la tonm dsi lo shien. Zot i pans pa demoun i fé plis déga ké lo shien ? Mé sa sé in n’ot afèr. Moin mi rapèl étan marmaye, shak foi nou téi oi in shien, nou téi done ali koud’rosh mé sa té pli vré pou bann shien lété pa d nzéré, pars sak lété danzéré nou lété moin brav avèk. Alé ! Alon lèss par koté lo shien pou intérès anou la sosyété pars èl lé ranpli bon moun, mé èl néna in bonpé kanaye galman : tout kalité, tout péi, mèm bann z’éta lé voiyou é an parmi sak lé pli gran é k’i done azot in brové lonèkté, la démokrasi é la libèrté. Antouléka, nout kozman i invite anou pou méfyé bann mové frékantasyon épi bann mové l’antrènman, é zot i koné sa sé in n’afèr i mank pa dann nout sosyété... Méfyé mové lantrènman ! Sèl rokomandasyon i fo pa ou i antrenn sansa ké ou i lèss aou antréné. Alé ! Mi kite azot rofléshi la dsi é ni artrouv pli dvan. Sipétadyé !